ХБНГУ-д зохион байгуулагддаг Олон Улсын Түвшний Мэргэшсэн Менежер Бэлтгэх Чадамжид Суурилсан Сургалт

2019/07/25

Холбооны Бүгд Найрамдах Герман Улсын ЗАСГИЙН ГАЗРЫН Тэтгэлгээр зохион байгуулагддаг  “Олон Улсын Түвшний Мэргэшсэн Менежер Бэлтгэх Чадамжид Суурилсан Сургалтын Хөтөлбөр”

        ХБНГУ болон Монгол улсын засгийн газар хооронд байгуулсан гэрээний дагуу хоёр орны аж ахуйн нэгж, хувийн хэвшил, жижиг дунд үйлдвэр, компаниудын удирдагчдын үйл ажиллагааг дэмжих бодлогоор Монголын ААНБ-ын менежерүүдийг сонгон шалгаруулж Герман улсын ААНБ дээр дөрвөн долоо хоногийн турш (28 хоног) Германы ААНБ-ын мэргэшсэн менежерүүдийг дагалдуулан сургах, чадамжид суурилсан сургалтын “Олон улсын түвшний мэргэшсэн менежер бэлтгэх сургалт, хөтөлбөр”-т ХБНГУ-ын засгийн газрын тэтгэлгээр хамруулдаг болно.

         Уг бизнесийн сургалт, хөтөлбөр нь 2009 оноос хойш Монгол улсад хэрэгжиж эхэлсэн бөгөөд одоогоор 400 гаруй компаний удирдлагууд амжилттай суралцаж төгсөөд байна. Сургалт, хөтөлбөрийг хэрэгжүүлэгч байгууллага нь Монголын талаас “Монголын Ажил Олгогч Эздийн Нэгдсэн Холбоо” (МАОЭНХ), ХБНГУ-ын талаас “GIZ” байгууллагууд байдаг.

Сургалт, хөтөлбөрийн гол зорилго нь хувийн хэвшлийн аж ахуйн нэгж, ЖДҮ, компаниудын үйл ажиллагаа тэдгээрийн хөгжлийг хурдасгах, Герман улсын шилдэг менежментийн үйл ажиллагаанаас Монголын менежерүүдийг дагалдуулан сургах замаар, ур чадварыг нь дээшлүүлж орчин үеийн шинэ техник технологи болон арга барилыг эзэмшиж өөрийн ААНБ-д нэвтрүүлэх, ХБНГУ-ын ААНБ-тай шууд холбоо тогтоох, хамтран ажиллах боломжийг нээж өгөх, худалдаа эдийн засгийн хамтын ажиллагааг өргөжүүлж хөгжүүлэхэд чиглэж байгаа болно.

Энэхүү сургалт, хөтөлбөр нь 5-н үе шатаас бүрдэх ба үүнд:

1. Монголоос оролцогчид өөрийн байгууллагын үйл ажиллагаа, сургалтанд хамрагдах зорилгоо танилцуулж сонгон шалгаруулант хамрагдах үе шат,
2. Сонгогдсон оролцогчдыг Монголд бэлтгэл хангуулах үе шатны арга хэмжээ,
3. ХБНГУ-н ААНБ дээр чадамжид суурилсан сургалтанд хамрагдах үе шат,
4. ХБНГУ-д хамрагдсан сургалтын тайланг бичиж сургалтын үр дүнгээ хамгаална.
5. МАОЭНХолбоонд ХБНГУ-д хамрагдсан сургалтын тайланг танилцуулж хэрэгжүүлэх арга хэмжээний төлөвлөгөөг батлуулах үе шат

Эхний 4-үе шатны хөтөлбөрт амжилттай оролцсон оролцогч олон улсын түвшний мэргэшсэн менежерийн сертификатыг ХБНГУ-ын ОУХН-ээс (GIZ) гардан авах болно.

Сургалт, хөтөлбөрт аж ахуйн нэгж, байгууллагын шийдвэр гаргах түвшний менежер, удирдлагуудад энэхүү хөтөлбөрт хамрагдах бөгөөд дундаас дээш түвшний Англи хэлний мэдлэгтэй, ХБНГУ-ын ямар нэгэн аж ахуйн нэгж, компаниудтай бизнесийн холбоо тогтоон цаашид хамтран ажиллах, хэрэгжүүлэх тодорхой бизнесийн зорилготой байх шаардлагыг хангасан байх нөхцөлтэй.

Иймд хөтөлбөрт хамрагдах сонирхолтой үйлдвэр, компани, аж ахуйн нэгжийн удирдах ажилтан МАОЭНХ-ны сургалт, хөгжлийн хэлтсийн утсаар холбогдож дэлгэрэнгүй мэдээллийг авна уу.

Монголын Ажил Олгогч Эздийн Нэгдсэн Холбоо